राश्वपाका सभापति र २ मन्त्री भेट्दा प्रधानमन्त्रीले अमेरिकी विदेश सहायक मन्त्री कपुरलाई भेट दिएनन्

काठमाडौं– प्रधानमन्त्री बालेन्द्र शाह (बालेन) ले अमेरिकी विदेश मन्त्रालयका दक्षिण तथा मध्य एशिया मामिला हेर्ने सहायक विदेशमन्त्री समीर पल कपूरलाई भेट दिएका छैनन् ।

अमेरिकी सहायक विदेशमन्त्री कपूरको आज नेपाल भ्रमण सम्पन्न भएको छ । भ्रमणका क्रममा कपूरले उच्चस्तरीय भेटवार्ता गरेका छन् । अर्थमन्त्री डा.स्वर्णिम वाग्ले, परराष्ट्रमन्त्री शिशिर खनाल लगायतसँग भेट गरे पनि कपूरले प्रधानमन्त्री शाहसँग भने भेट गर्न पाएनन् । नेपालस्थित अमेरिकी राजदूतावासले सामाजिक सञ्जालमा राखेको तस्बिर र पोस्टमा प्रधानमन्त्री शाहसँगको भेट भएको बारे खुलाएको छैन ।

सहायक विदेशमन्त्री कपूरले नेपाल–अमेरिका साझेदारी सुदृढ गर्ने र व्यापारिक सम्बन्ध विस्तार गर्ने विषयमा छलफल गरेको नेपालस्थित अमेरिकी दूतावासले जनाएको छ । यसअघि, कुनै पनि विदेश प्रतिनिधि मण्डल तथा व्यक्ति आउँदा प्रधानमन्त्रीलाई बालुवाटार वा सिंहदरबारमा पुगेर भेट गर्ने गर्दथे ।

नेपाल भ्रमणका क्रममा कपूरले राष्ट्रिय स्वतन्त्र पार्टी (रास्वपा) सभापति रवि लामिछाने, अर्थमन्त्री डा.स्वर्णिम वाग्ले, परराष्ट्रमन्त्री शिशिर खनालसँग उच्चस्तरीय भेटवार्ता गरेका छन् ।

भारतीय मूलका अमेरिकी सहायक विदेशमन्त्री कपूर वैशाख ७ गते काठमाडौं आएका थिए । रास्वपाका वरिष्ठ नेता शाह नेतृत्वको सरकार बनेपछि कपूर काठमाडौं आउने सबैभन्दा वरिष्ठ विदेशी कूटनीतिज्ञ हुन् । कपुर यसअघि बंगलादेशमा पनि नयाँ सरकार गठन लगत्तै पुगेका थिए । गत मार्चमा गएका कपुरले अन्य मन्त्रीहरुलाई भेटे पनि प्रधानमन्त्री तारिक रहमानलाई भने भेटेका थिएनन् ।

अमेरिकी राष्ट्रपति डोनाल्ड ट्रम्पले २०२५ अक्टोबरमा दक्षिण तथा मध्य एशिया हेर्ने सहायक विदेशमन्त्री डोनाल्ड लुकलाई हटाएर सुरक्षा मामिला विज्ञ कपुरलाई नियुक्त गरेका थिए।

Image Source: © https://mulpatra.com