असक्षम नेतृत्वको भारमा संघः सल्लाहकारमा बस्ने पुर्वअध्यक्षहरुको अस्वीकार, एक्लिदै गुरुङ

काठमाडौं– असक्षम नेतृत्वको भार बोकिरहेको वैदेशिक रोजगार व्यवसायी संघका अध्यक्ष भुवनसिंह गुरुङलाई फेरि अर्को झट्का परेको छ ।

संघका अध्यक्षगुरुङले सल्लाहकारका रूपमा अघि सारेका पुर्वअध्यक्षहरु रोहन गुरुङ र प्रेम कटुवालले प्रबन्धमा बसेर काम गर्न अस्वीकार गरेका छन् । योसँग अध्यक्ष भुवन गुरुङ असक्षम भएको भन्दै संघभित्रको असन्तुष्टि सतहमा आएको छ ।

नेतृत्व कमजोर हुँदा संघको विश्वसनीयता मात्र होइन, व्यवसायीहरूको आवाजसमेत कमजोर बन्दै गएको टिप्पणी हुन थालेको छ । समस्यामा परेको क्षेत्रलाई समाधान होइन, सिण्डिकेट र गुटको राजनीति गर्ने प्रयास भइरहेको छ ।

संघको विधानको दफा २६को उपदफा(४)मा कार्यसमितिको विघटन सम्बन्धि व्यवस्था छ । ‘कार्यसमितिका दुई तिहाइ पदाधिकारीहरुले सामुहिक राजिनामा दिएमा कार्यसमिति स्वतः विघटन हुनेछ र सोहि दिन सल्लाहकारहरुको रोहवरमा एक सात सदस्य प्रवन्ध समिति खडा गरि प्रबन्ध समितिले २१ दिनभित्र विशेष साधारणसभा बोलाइ सोहि दिन निर्वाचन गराउने व्यवस्था छ,’ विधानमा भनिएको छ ।

यहि प्रावधान अनुसार कार्यसमिति विघटन भएको भनिएको छ । भुवनसिंह गुरुङ नेतृत्वको कार्यसमितिका सात जना पदाधिकारीमध्य पाँच जनाले सामूहिक राजिनामा दिएका थिए ।

विधानमा कार्यसमिति विघटन भएपछि सोही दिन सल्लाहकारहरुको रोहवरमा एक सात सदस्य प्रबन्ध समिति खडा गरी प्रबन्ध समितिले २१ दिन भित्र विशेष साधारण सभा बोलाई सोही दिन निर्वाचन सम्पन्न गराउने व्यवस्था छ ।

Image Source: © https://mulpatra.com

संघको कार्यसमिति विघटन गरिएपछि सल्लाहकार तथा निवर्तमान अध्यक्ष राजेन्द्र भण्डारीको संयोजकत्वमा प्रबन्ध समिति गठन गरिएको छ । प्रबन्ध समितिमा पूर्व अध्यक्ष विमल ढकाल, जनक रावल, धनलाल जैसी, मधुकर रिजाल, विनोदजंग केसी र वरिष्ठ अधिवक्ता शम्भु निरौला रहेका छन् ।

कर्मचारीलाई चार महिनादेखि तलब दिन नसकिएको अवस्थामा समेत अध्यक्ष गुरुङले बिना ब्याज ‘सापट’ भन्दै लाखौं रुपैयाँ लगेको र सो रकम हालसम्म फिर्ता नभएको दाबी गरिएको छ ।

विवादको केन्द्रमा रहेको ३२ लाख रुपैयाँको चेक अध्यक्ष गुरुङका निकट मानिएका कार्यसमिति सदस्य कृष्ण ढकालको कन्स्ट्रक्शन कम्पनीको नाममा जारी गरिएको भेटिएको छ ।

उक्त चेक जेन्जी आन्दोलनका क्रममा क्षति पुगेको गौशाला प्रहरी वृत्त पुनर्निर्माण कार्यका लागि ‘ग्यारेन्टी’ स्वरूप दिइएको बताइएको छ तर संघका अध्यक्ष भने यसलाई सिण्डिकेटको संज्ञा दिदै दोष महासचिव महेश बस्नेत र कोषाध्यक्षलाई लगाइरहेका छन् ।

साथै, कुनै औपचारिक टेन्डर प्रक्रिया बिना अध्यक्षको ठाडो निर्देशनमा उक्त कार्य अघि बढाइएको समेत आरोप लगाइएको छ । यसरी नै वैदेशिक रोजगार विभागमा समेत उनै कृष्ण ढकालको कम्पनीले काम गरीरहेको र पटक पटक गरी करिब ३० लाख रकम ढकालले संघबाट लगिसकेको पनि रेकर्डमा देखिन्छ ।

संघको खातामा तत्काल पर्याप्त रकम नभएको अवस्थामा ग्यारेन्टी स्वरूप मात्र चेक जारी गरिएको र सम्बन्धित कामको अन्तिम प्रतिवेदन नआएसम्म चेक सटही गर्न नमिल्ने अवस्था रहेको निवर्तमान महासचिव र कोषाध्यक्ष पक्षको भनाइ छ ।

आफुले चौकी बनाउन खर्चिएको पैसाको चेक लिएका र यसलाई लगत प्रचार गरिएको ढकालले बताए । संघले गौशला प्रहरी चौकी बनाएको थियो । त्यति बेला मैले खर्च गरेको थिए । अहिले त्यसैको चेक लिएको उनको दाबी छ ।