डाबर ब्राण्डको मह गुणस्तरहीन, तत्काल फिर्ता लिन निर्देशन

काठमाडौँ । नेपाली बजारमा चर्चित रहेको डाबर ब्राण्डको मह खान अयोग्य भेटिएको छ । बजारमा बिक्री भइरहेको डाबर ब्राण्डको मह गुणस्तरहीन भेटिएपछि खाद्य प्रविधि तथा गुण नियन्त्रण विभागले तत्काल बजारबाट फिर्ता गर्न आदेश दिएको छ ।

खाद्य प्रविधि तथा गुण नियन्त्रण विभागले जारी गरेको सूचनाअनुसार बजार अनुगमन तथा नमुना परीक्षणका क्रममा डाबर ब्राण्डको ५ सय ग्राम प्याकेटको मह गुणस्तर मापदण्डअनुसार नभएको भेटिएको हो ।

विभागले ब्याच नम्बर ‘NB00477’ रहेको उक्त मह प्रयोगशाला परीक्षणमा प्रतिकूल देखिएपछि बजारबाट तत्काल फिर्ता गर्न निर्देशन दिएको विभागले जनाएको छ ।

विभागबाट जारी सूचनाअनुसार उक्त उत्पादनको उत्पादन मिति २०२५÷१२ उल्लेख गरिएको छ भने उपभोग अवधि १८ महिना रहेको छ ।

विभागले खाद्य स्वच्छता तथा गुणस्तर ऐन, २०८१ को व्यवस्थाअनुसार सम्बन्धित ब्याचका सबै उत्पादन बिक्री वितरण नगर्न तथा नगराउनसमेत निर्देशन दिएको छ ।

उक्त महको उत्पादक कम्पनी डाबर नेपाल प्रा. लि. जितपुर सिमरा बारा रहेको विभागले जनाएको छ ।

Image Source: © https://mulpatra.com