बालेन संसदमा नआए सदन चल्न नदिने

काठमाडौं– विपक्षी दलहरूले ‘प्रधानमन्त्रीसँग प्रश्नोत्तर’ कार्यक्रम कार्यान्वयन नगरी संसद् चल्न नसक्ने बताएका छन् ।

बिहीबार बसेको प्रतिनिधि सभा बैठकमा बोल्दै नेकपा एमालेका प्रमुख सचेतक ऐन महरले प्रतिनिधि सभा नियमावली २०७९ को नियम ५६ अनुरूपको प्रधानमन्त्रीसँग प्रश्नोत्तर कार्यक्रम नहुँदासम्म प्रतिनिधि सभा बैठक चल्न नसक्ने बताएका हुन्।

महरले प्रधानमन्त्रीको नियत संसद्लाई छल्ने, उपेक्षा गर्ने रहेको आरोप समेत लगाए। ‘नियम ५६ मा प्रधानमन्त्रीसँग प्रश्नोत्तर गर्ने भन्ने छ । जेठ महिनाको ७ गते भइसक्यो। आकस्मिक, शून्य र विशेष समय सकिँदा पनि अत्तोपत्तो भएन। नियम ५६ लाई कार्यान्वयन गरियोस्,’ सांसद महरले भने ।

उनले नियम ५६ कार्यान्वयन नहुँदासम्म संसद् अगाडि नबढाउन आग्रह गरे। ‘नियम ५६ कार्यान्वयन नगर्दासम्म हाम्रो विरोध जारी राख्ने जानकारी गराउँछौँ,’ महरले भने।

महरपछि विरोध गरिरहेका श्रम संस्कृति पार्टीका सांसद आर्यन राई र नेपाली कम्युनिस्ट पार्टी(नेकपा)का प्रमुख सचेतक युवराज दुलालले पनि महरको भनाइमा समर्थन जनाए।

राष्ट्रिय प्रजातन्त्र पार्टी(राप्रपा)की प्रमुख सचेतक खुश्बु ओलीले उक्त भनाइमा समर्थन गरेकी थिइन्।

Image Source: © https://mulpatra.com