विश्वकप सेमिफाइनल इङ्ग्ल्याण्ड–अर्जेन्टिना भिडन्तमा कसको पल्ला भारी ?

काठमाडौं । फिफा विश्वकप २०२६ को सेमिफाइनलमा इङ्ग्ल्याण्ड–अर्जेन्टिना प्रतिस्पर्धामा उत्रदैछन् । यस खेलअघि विश्व फुटबलको सबैभन्दा ऐतिहासिक प्रतिस्पर्धामध्ये एक फेरि विश्वकपको सेमिफाइनलमा फर्किएको छ। सन् १९६६ को विश्वकपदेखि सुरु भएको प्रतिस्पर्धा, १९८६ मा डिएगो म्याराडोनाको ‘ह्यान्ड अफ गड’ र ‘गोल अफ द सेन्चुरी’ १९९८ को रातो कार्ड विवाद तथा २००२ मा डेभिड बेकह्यामको पेनाल्टीमार्फत इंग्ल्याण्डको बदला—यी सबै घटनाले यो प्रतिस्पर्धालाई विशेष बनाएका छन्।

अहिलेसम्म दुवै टोलीबीच आधिकारिक अन्तर्राष्ट्रिय खेलमा इंग्ल्याण्डले हल्का अग्रता कायम गरेको छ। १४ भेटमध्ये इंग्ल्याण्डले ६ खेल जितेको, अर्जेन्टिनाले ३ खेल जितेको तथा ५ खेल बराबरीमा सकिएको तथ्यांक छ। विश्वकपमा भने दुवै टोलीले एकअर्काविरुद्ध सम्झनलायक जित निकालेका छन्।

२०२६ विश्वकपमा भने दुवै टोली उत्कृष्ट लयमा छन्। इंग्ल्याण्डले क्वार्टरफाइनलमा नर्वेलाई २–१ ले हराउँदा जूड बेलिङ्घमले दुवै गोल गरेका थिए। अर्जेन्टिनाले स्विट्जरल्याण्डलाई अतिरिक्त समयमा ३–१ ले हराउँदै अन्तिम चारमा स्थान बनाएको थियो। त्यस खेलमा लियोनल मेस्सीले गोल नगरे पनि निर्णायक असिस्ट दिए भने जुलियन आल्भारेज र लाउटारो मार्टिनेजले गोल गरे।

इङ्ग्ल्याण्डका सबैभन्दा ठूलो हतियार कप्तान ह्यारी केन र जूड बेलिङ्घम हुन्। यस विश्वकपमा इंग्ल्याण्डका अधिकांश गोल यही दुई खेलाडीबाट आएका छन्। प्रशिक्षक थोमस टुखेलको टोलीले पछाडि परेको अवस्थाबाट पनि खेल फर्काउने क्षमता देखाएको छ, जसलाई धेरै अन्तर्राष्ट्रिय सञ्चारमाध्यमले इंग्ल्याण्डको सबैभन्दा ठूलो बलका रूपमा विश्लेषण गरेका छन्।

अर्जेन्टिनाको पक्षमा भने अनुभव र सामूहिक तालमेल बलियो देखिएको छ। विश्वकप विजेता प्रशिक्षक लियोनेल स्कालोनीको टोलीमा लियोनेल मेस्सी, जुलियन आल्भारेज, लाउटारो मार्टिनेज, एलेक्सिस म्याक एलिस्टर र एन्जो फर्नान्डेज जस्ता खेलाडी छन्। कठिन अवस्थामा पनि खेल नियन्त्रण गर्ने र अतिरिक्त समयमा निर्णायक हुने क्षमता अर्जेन्टिनाले यस विश्वकपमा पटक–पटक देखाइसकेको छ।

अनुभवको हिसाबले अर्जेन्टिना अलि अगाडि देखिन्छ। मेस्सी, म्याक एलिस्टर र लाउटारोले विश्वकप जितिसकेका छन्। इंग्ल्याण्डसँग भने युवा ऊर्जा, उच्च प्रेसिङ र शारीरिक क्षमता बढी छ। बेलिङ्घमले यस विश्वकपमा उत्कृष्ट प्रदर्शन गर्दै इंग्ल्याण्डलाई कठिन अवस्थाबाट अघि बढाएका छन्।

Image Source: © https://mulpatra.com

विश्व सञ्चारमाध्यमहरूले यो खेललाई केवल सेमिफाइनल मात्र नभई ‘इतिहास, भावना र विश्व फुटबलका दुई परम्परागत शक्तिको नयाँ अध्याय’ का रूपमा चित्रण गरेका छन्। रोयटर्सले इंग्ल्याण्डको मानसिक दृढतालाई मुख्य शक्ति भनेको छ भने अर्जेन्टिनालाई उपाधि रक्षा गर्ने सबैभन्दा अनुभवी टोलीका रूपमा प्रस्तुत गरेको छ। टाइम्स अफ इन्डियाले फ्रान्स, स्पेन, इंग्ल्याण्ड र अर्जेन्टिना एकैपटक सेमिफाइनल पुगेको घटना ३६ वर्षयताकै पहिलो भएको उल्लेख गरेको छ।

यदि खेलको गति उच्च रह्यो र बेलिङ्घम–केनको जोडीले सुरुमै दबाब बनाउन सफल भयो भने इंग्ल्याण्ड फाइनल नजिक पुग्न सक्छ। तर खेल लामो समयसम्म बराबरी रह्यो भने अर्जेन्टिनाको अनुभव, मेस्सीको खेल पढ्ने क्षमता र स्कालोनीको रणनीतिक परिवर्तन निर्णायक बन्न सक्छ। त्यसैले अनुभवका आधारमा अर्जेन्टिना र वर्तमान फर्मका आधारमा इंग्ल्याण्डबीच अत्यन्तै सन्तुलित प्रतिस्पर्धा हुने अपेक्षा गरिएको छ। –एजेन्सीको सहयोगमा