मेचिनगरको मेची क्राउन भारतको उडान ग्रुपले लियो लिजमा

काठमाडौं । झापाको मेचिनगरमा अवस्थित पाँचतारे होटल मेची क्राउन भारतको उडान एण्ड रिसोर्ट ग्रुपले १२ बर्षका लागि लिजमा लिएको छ ।

भारतको सिक्किम, दार्जिलिङ देखि अन्य विभिन्न शहरमा होटल सन्चालन गर्दै आएको सो ग्रुपले नेपालमा पहिलो पटक मेची क्राउन भाडामा लिएको हो ।

होटल खुलेको छोटो समयमा भारतीय माझ चर्चित भएको मेची क्राउन विवाह र पार्टी र वेडिङ डेष्टिनेशन र क्यासिनोका लागि रोजाइमा पर्दै आइरहेको थियो । पर्यटकको चापको कारण सन्चालनको २ बर्ष मै १ सय कोठा थपेको मेची क्राउन भाडामा लिएपनि सन्चालकलाई आम्दानी समेत बाँड्ने सम्झौतामा उल्लेख भएको छ ।

भारतको अन्तर्राष्टिय विमानस्थल बागडोगराबाट १२ किलोमिटरको दुरीमा रहेको र नेपालकै ठुलो क्यासिनो भेगास रहेकाले भारतीय खेलाडीहरुको प्रमुख गन्तव्यका रुपमा रहन गएको छ ।

पूर्वी नाका काँकडभिट्टादेखि भारत, बंगलादेश र भुटान छोटो दूरीमा रहेकाले त्यहाँका पर्यटक आउने गरेका छन्। होटलमा पाँच सुइट रूम, १० भिल्ला, २० क्लब रुम र ७० डिलक्स रुम छन्। दुईवटा रेस्टुरेन्ट, ब्यांक्वेट हलसहित हेलिप्याडको सुविधासमेत छ।
आठ बिघा क्षेत्रफल ओगटेको मेची क्राउन परिसरमा १ हजार वृक्षारोपण गरिएको छ। यसले वातावरण सुहाउँदो बनाउन सहयोग पुगेको छ। त्यस्तै, स्विमिङ पुल, स्पा सेन्टर, स्टिम बाथ, जिम हल, टेनिस कोर्ट र ब्युटिपार्लर भवन परिसरमै छन्।