कुवेतमा विदेशी घरेलु कामदारलाई कुटपिट गर्ने दम्पतीलाई मृत्युदण्डको सजाय

काठमाडौं– कुवेतमा एक आप्रवासी घरेलु कामदारलाई अमानवीय रूपमा कुटपिट गरी हत्या गरेको अभियोगमा कुवेतको फौजदारी अदालतले एक परिवारका दम्पतीलाई मृत्युदण्डको सजाय दिने भएको छ ।

मृतकको परिचय भने खुलाइएको छैन । सरकारी अभियोजनकर्ताहरूले दम्पतीले उनलाई चोटपटक लागेर मृत्यु नभएसम्म दबाबमा काम गरिरहन बाध्य पारेको जिकिर लिएका थिए ।

आप्रवासी घरेलु कामदारलाई गैरकानुनी थुनामा राख्ने, लठ्ठीले बारम्बार आक्रमण गर्ने, चिकित्सा हेरचाह अस्वीकार गर्ने र जबरजस्ती श्रम गराउने जस्ता कार्य गर्दा कामदारको मृत्यु भएको अदालतले ठहर गरेको छ ।

गल्फ न्युजका अनुसार पछिल्लो समय कुवेतमा आप्रवासी घरेलु कामदारहरूमाथि दुव्र्यवहार बढ्दो छ । २०२३ को सुरुमा एक कुवेतीले फिलिपिनी कामदारको बलात्कारपछि हत्या गरेर जलाएका थिए । त्यसपश्चात फिलिपिन्स सरकारले पर्याप्त सुरक्षाको अभाव भन्दै कुवेतमा घरेलु कामदार पठाउन अस्थायी प्रतिबन्ध लगाएको थियो ।