मलेसियाले नयाँ कामदार भर्ना प्रक्रिया १० मापदण्डको शर्त राख्यो, मापदण्डभित्र पर्ने म्यानपावरले मात्र कामदार पठाउन सक्ने

काठमाडौं– मलेसिया सरकारले विदेशी कामदार भित्र्याउन निष्पक्ष र योग्यतामा आधारित मुल्यांकन (भेटिङ) प्रणाली लागू गर्ने भएको छ । भेटिङ प्रणाली लागू भएपछि नयाँ कामदार भर्ना प्रक्रियामा १० मापदण्डको शर्त राखिएको छ । नेपाली राजदूतावास क्वालालम्पुर मलेसियालाई पुत्रजयबाट २७ अक्टोबर २०२५ मा पठाइएको पत्रमा यस्तो भनिएको छ ।

भेटिङ मापदण्डभित्र पर्ने र त्यसका मापदण्ड पुरा गरेका म्यानपावरले मात्र मलेसिया वैदेशिक रोजगारीमा कामदार पठाउन पाउने मलेसियाको परराष्ट्र मन्त्रालय मलेसियास्थित नेपाली दूतावासलाई पत्रचार गरेको छ । तर मलेसियाले पठाएको पत्रमा मापदण्ड भने खुलाइएको छैन ।

भेटिङ नीतिले दुई देशबीचको रचनात्मक र नैतिक श्रम आप्रवासन अभ्यासलाई सुदृढ गर्न महत्वपूर्ण योगदान हुने पत्रमा उल्लेख गरिएको छ । पत्रमा कामदार भर्ना र स्थानान्तरण गर्न अनुमति प्राप्त इजाजतपत्र प्राप्त निजी एजेन्सीहरू नोभेम्बर १५ भित्र आफनो दर्ता गराउन भनिएको छ ।

नेपाल सरकारलाई माथि उल्लिखित मापदण्ड पूरा गर्ने इजाजतपत्र प्राप्त निजी भर्ती एजेन्सीहरूको सूची १५ नोभेम्बर २०२५ पछि समीक्षा र परीक्षण उद्देश्यका लागि मानव संसाधन मन्त्रालयमा पेश गर्न अनुरोध पत्रमा गरिएको छ ।

नेपालबाट मलेसियामा कामदार भर्ना र स्थानान्तरण गर्न अनुमति प्राप्त इजाजतपत्र प्राप्त निजी भर्ती एजेन्सीहरूको संख्यालाई तर्कसंगत बनाउन सहमत भएको विषयलाई समेत पत्रमा उल्लेख गरिएको छ ।

संलग्न कागजातमा उल्लिखित दस १० अनिवार्य मापदण्डहरू अनुसार मानव संसाधन मन्त्रालयद्वारा प्रशासित वस्तुनिष्ठ र योग्यतामा आधारित परीक्षण प्रक्रिया मार्फत कार्यान्वयन गरिनेछ । यसमा नेपालबाट मलेसिया कामदार पठाउँदै गरेका म्यानपावरको संख्या व्यवस्थित बनाउने समेत भनिएको छ । अपूर्ण आवेदनहरू वा निर्दिष्ट मापदण्डहरू पूरा नगर्ने म्यानपावर कम्पनीहरु सूचीकरण नगरिने समेत बताइएको छ ।

Image Source: © https://mulpatra.com

मलेसियाले दूतावासलाई पठाएको पत्र