१० बैंकको लोन पोर्टफोलियो रिभ्यु सकियो, केही दिनमा राष्ट्र बैंकलाई हस्तान्तरण गरिने

काठमाडौं– नेपालका १० वटा ठूला वाणिज्य बैंकको लोन पोर्टफोलियो रिभ्यु कार्य सम्पन्न भएको छ । बंगलादेशको लेखापरीक्षण फर्म हाउल्याडर युनुस एन्ड कम्पनीले १० वाणिज्य बैंकको स्थलगत निरीक्षण गरेको हो ।

उनीहरुको लोन पोर्टफोलियो रिभ्यु गर्न बंगलादेशी अडिटरको टिम नेपालमा आएको थियो । उक्त टोलीबाट नेपालका १० ठूला वाणिज्य बैंकहरूको सम्पत्तिको गुणस्तर परीक्षण (लोन पोर्टफोलियो रिभ्यु) का लागि स्थलगत सुपरीवेक्षण भइरहेको थियो । टोलीमा नेपाल राष्ट्र बैंकका प्रतिनिधि पनि सहभागि रहेका छन् ।

टोलीले बैंकका कर्जा फाइलहरू, कोर बैंकिङ सिस्टम, परियोजना लगानीको अवस्था र कर्जा भुक्तानी प्रक्रियाको विस्तृत अध्ययन सकेको छ । केही दिनमा रिपोर्ट हस्तान्तरण गर्ने जनाइएको छ । गत चैतको वासलताका आधारमा धेरै कर्जा लगानी भएका ग्लोबल आईएमई, नबिल, नेपाल इन्भेष्टमेन्ट मेगा, राष्ट्रिय वाणिज्य, कुमारी, लक्ष्मी सनराइज, प्रभु, हिमालयन, एनएमबि र एनआईसी एशिया बैंक गरी १० वटा बैंक परीक्षणको दायरामा छन् । यो परीक्षण अन्तर्राष्ट्रिय मुद्रा कोषसँगको विस्तारित कर्जा सुविधाको सर्तअनुसार भइरहेको हो ।

नेपाल राष्ट्र बैंकले खरिद प्रक्रियामार्फत बंगलादेशी फर्मलाई छनोट गरेको हो । राष्ट्र बैंक स्रोतका अनुसार संयुक्त टोलीले सबै बैंकमा साढे दुई दर्जन सूचकका आधारमा सम्पत्तिको गुणस्तर मूल्यांकन गरेको हो । कर्जाको सदुपयोग, ऋणीको परियोजनाको अवस्था, र कर्जा भुक्तानी प्रणालीको पनि परीक्षण भएको छ । राष्ट्र बैंकले कुनै लोन फाइलमा कैफियत देखिएमा त्यसमा सम्बन्धीत बैंकलाई पर्याप्त सुनुवाई र प्रष्टिकरणको मौका दिने छ ।