इरानमा यसै हप्ता भिषण सैन्य आक्रमण हुन सक्ने, ट्रम्को अन्तिम निर्णय कुर्दै अमेरिकी सेना

काठमाडौँ– अमेरिका र इरानबीचको तनाव फेरि एकपटक उत्कर्षमा पुगेको छ। स्विट्जरल्याण्डको जेनेभामा भएको पछिल्लो परमाणु वार्तामा कुनै ठोस सहमति हुन नसकेपछि अमेरिकाले इरानमाथि सैन्य आक्रमणको तयारी गरेको खबर बाहिरिएको हो।

ह्वाइट हाउसकी प्रेस सचिव क्यारोलिन लेभिटले वार्तामा केही प्रगति भए पनि अझै धेरै गम्भीर मतभेदहरू बाँकी रहेको बताएकी छन्। राष्ट्रपति डोनाल्ड ट्रम्पले इरानलाई ‘सम्झौता गर्नु नै बुद्धिमानी हुने’ भन्दै नत्र कडा सैन्य परिणाम भोग्न तयार रहन चेतावनी दिएका छन्।

अमेरिकी सैन्य स्रोतलाई उद्धृत गर्दै सीएनएनले लेखेअनुसार, राष्ट्रपति ट्रम्पले आदेश दिएमा यसै हप्ताको अन्त्यसम्ममा इरानमाथि आक्रमण गर्न अमेरिकी सेना पूर्ण रूपमा तयार अवस्थामा छ। मध्यपूर्वमा अमेरिकी हवाई र नौसैनिक शक्तिमा व्यापक वृद्धि गरिएको छ र अत्याधुनिक विमान वाहक जहाज ‘यूएसएस जेराल्ड फोर्ड’ पनि यसै साता सो क्षेत्रमा पुग्ने सम्भावना छ।

राष्ट्रपति ट्रम्पले हिन्द महासागरको चागोस टापुमा रहेको हवाई अड्डा प्रयोग गरेर इरानी परमाणु ठेगानाहरूमा आक्रमण गर्न सक्ने सङ्केत समेत दिएका छन्। बुधबार ह्वाइट हाउसको ‘सिचुएसन रुम’ मा राष्ट्रिय सुरक्षा अधिकारीहरूको महत्त्वपूर्ण बैठकमा यस विषयमा गम्भीर छलफल भएको थियो। जारेड कुश्नर र विशेष दूत स्टिभ विट्कफले इरानसँगको पछिल्लो संवादबारे राष्ट्रपतिलाई ब्रिफिङ गरिसकेका छन्।

राष्ट्रपति ट्रम्प यतिबेला सैन्य कारबाहीका पक्ष र विपक्षमा रहेका तर्कहरूमाथि परामर्श गरिरहनुभएको छ, यद्यपि उहाँले अन्तिम निर्णय लिन भने बाँकी नै छ। अमेरिकी दबाबका बीच इरानले रूससँग मिलेर ओमानको खाडीमा संयुक्त नौसैनिक अभ्यास गर्ने घोषणा गरेको छ। रूसी विदेशमन्त्री सर्गेई लाभरोभले इरानमाथि हुने कुनै पनि नयाँ आक्रमणले ‘आगोसँग खेल्ने’ काम गर्ने भन्दै गम्भीर परिणामको चेतावनी दिएका छन्।

इरानले पनि आफ्ना मुख्य परमाणु स्थलहरूलाई सुरक्षित बनाउन कङ्क्रिट र माटोले पुर्ने काम गरिरहेको स्याटेलाइट तस्बिरहरूले देखाएका छन्। आक्रमणको सम्भावित समयलाई लिएर विभिन्न क्षेत्रीय र धार्मिक संवेदनशीलताहरू देखिएका छन्। हाल जारी शीतकालीन ओलम्पिक आइतबार सकिँदैछ भने बुधबारदेखि मुस्लिमहरूको पवित्र महिना रमजान सुरु भएको छ।

Image Source: © https://mulpatra.com

रमजानको समयमा आक्रमण गर्दा मुस्लिम राष्ट्रहरूमा नकारात्मक सन्देश जाने भन्दै केही अमेरिकी सहयोगी देशहरूले ट्रम्पलाई संयमता अपनाउन आग्रह गरिरहेका छन्। कुटनीति र युद्धको यो दोसाँधमा आगामी केही दिन विश्वकै लागि निकै संवेदनशील मानिएको छ।