बर्डफ्लुको सङ्क्रमण बढ्दै, राजधानीमा मरेका कागमा समेत देखियो, सचेत रहन विभागको आग्रह

काठमाडौं । नेपालमा बर्डफ्लु (एच५एन१) सङ्क्रमण पुनः फैलिन थालेको छ । झापा, मोरङ र सुनसरीका विभिन्न कुखुरा फार्ममा संक्रमण पुष्टि भएसँगै राजधानी काठमाडौंमा मृत भेटिएका कागहरूमा समेत बर्डफ्लु देखिएको पुष्टि भएपछि जोखिम थप बढेको छ । पशु सेवा विभागले अवस्था संवेदनशील बन्दै गएको भन्दै सर्वसाधारण तथा किसानलाई उच्च सतर्कता अपनाउन आग्रह गरेको छ ।

विभागका अनुसार नियमित निगरानीका क्रममा मोरङको सुनवर्षी नगरपालिका–४, उर्लाबारी–५ तथा सुन्दरहरैँचा क्षेत्रमा पालिएका कुखुरामा संक्रमण पुष्टि भएको हो । चैतको पहिलो सातादेखि कुखुरा मर्न थालेपछि गरिएको परीक्षणले बर्डफ्लु देखाएको थियो । संक्रमण फैलिन नदिन प्रभावित क्षेत्रका कुखुरा, अण्डा तथा अन्य सामग्री नष्ट गर्नुका साथै आवतजावतमा कडाइ गरिएको छ ।

झापाको दमक नगरपालिका–१० मा रहेको एक ठूलो लेयर्स फार्ममा पनि संक्रमण पुष्टि भएपछि करिब २० हजारभन्दा बढी कुखुरा नष्ट गरिएको छ । सो क्षेत्रमा कुखुरा, चल्ला, दाना तथा उपकरणको ओसारपसार पूर्ण रूपमा रोकिएको छ भने फार्ममा अनावश्यक प्रवेश निषेध गरिएको छ । नगरपालिकाले असामान्य रूपमा कुखुरा बिरामी हुने वा मर्ने घटना देखिएमा तुरुन्त जानकारी गराउन आग्रह गरेको छ ।

यसैबीच, काठमाडौंको कीर्तिपुरस्थित त्रिभुवन विश्वविद्यालय परिसरमा मृत भेटिएका कागहरूमा पनि बर्डफ्लु संक्रमण पुष्टि भएको छ । स्थानीय तह र पशु सेवा विभागको संयुक्त टोलीले दर्जनौं मृत काग सङ्कलन गरी सुरक्षित रूपमा गाडेको छ । थप कागहरू पनि मरेको पाइएकाले सङ्कलन र परीक्षणको काम जारी रहेको जनाइएको छ ।

कोशी प्रदेशमा गठन गरिएको ‘र्‍यापिड रेस्पोन्स टिम’ प्रभावित क्षेत्रमा सक्रिय रूपमा खटिएको छ । चैत ८ सम्म झापा, मोरङ र सुनसरीका विभिन्न फार्ममा रहेका ३७ हजारभन्दा बढी कुखुरा नष्ट गरिसकिएको छ । संक्रमण फैलिन नदिन फार्ममा जीवाणुनाशक प्रयोग अनिवार्य गरिएको छ भने एक फार्मका कामदार अर्को फार्ममा जान नपाउने लगायतका मापदण्ड लागू गरिएको छ ।

पशु सेवा विभागले बर्डफ्लु मानिसमा समेत सर्न सक्ने भएकाले विशेष सावधानी अपनाउन आग्रह गरेको छ । कुखुरा बिरामी वा मरेको अवस्थामा नछुने, व्यक्तिगत सरसफाइमा ध्यान दिने र कुखुराजन्य सामग्री प्रयोग गर्दा सतर्क रहने सुझाव दिइएको छ । साथै, कुनै स्थानमा असामान्य रूपमा कुखुरा मर्ने वा बिरामी हुने अवस्था देखिएमा नजिकको पशु सेवा कार्यालयमा तुरुन्त जानकारी गराउन विभागले अनुरोध गरेको छ ।

Image Source: © https://mulpatra.com