राष्ट्रिय योजना आयोगका उपाध्यक्ष श्रेष्ठले दिए राजिनामा

काठमाडौं । आज बालेन नेतृत्वको सरकार बन्दै गर्दा सुसिला कार्की सरकारबाट नियुक्ति भएका राष्ट्रिय योजना आयोग उपाध्यक्ष डा. प्रकाशकुमार श्रेष्ठले पद त्यागेका छन्। आज बालेनले प्रधानमन्त्रीको सपथ पछि सरकारको औपचारिक गठनअघि नै उनले जिम्मेवारीबाट अलग हुने निर्णय सार्वजनिक गरेका हुन्।
रास्वपाका वरिष्ठ नेता बालेन्द्र साह नेतृत्वमा नयाँ सरकार गठनको तयारी भइरहँदा, राजनीतिक नियुक्तिमा रहेका पदाधिकारीहरूलाई मार्गप्रशस्त गर्न आग्रह गरिएको थियो। सामान्यतया सरकार परिवर्तनपछि मात्र पद छोड्ने प्रचलन भए पनि श्रेष्ठले त्यसअघि नै राजीनामा दिँदै नयाँ सरकारका लागि बाटो खुला गरेका छन्।

श्रेष्ठलाई सुशीला कार्की नेतृत्वको अन्तरिम सरकारले नियुक्त गरेको थियो। करिब १०१ दिनको कार्यकाल पूरा गरेपछि उनले सामाजिक सञ्जालमार्फत आफ्नो जिम्मेवारी सकिएको जानकारी दिँदै सरकारप्रति आभार व्यक्त गरेका छन्। उनले विशेषतः प्रधानमन्त्री सुशीला कार्की, अर्थमन्त्री रामेश्वर खनाल र मन्त्रिपरिषद्लाई अवसरका लागि धन्यवाद दिएका छन्।

छोटो कार्यकालमा सम्पन्न भएका काम, अपूर्ण रहेका कार्यसूची, चालु आर्थिक वर्षका प्राथमिकता तथा विकास आयोजनाको प्रभावकारिता बढाउन आवश्यक सुधारबारे पनि उनले आफ्ना अनुभव सार्वजनिक गरेका छन्। पुँजीगत खर्च वृद्धि र योजना कार्यान्वयनमा सुधार अपरिहार्य रहेको उनको संकेत छ।

डा. श्रेष्ठ यसअघि केपी शर्मा ओली नेतृत्वको सरकारमा योजना आयोग सदस्य रहिसकेका छन् भने नेपाल राष्ट्र बैंकमा कार्यकारी निर्देशकको भूमिका पनि निर्वाह गरेका थिए।

श्रेष्ठजस्तै राजनीतिक नियुक्ति पाएका अन्य विभिन्न पदमा आसीनहरुबाट समेत सत्ताको नेतृत्व गर्न लागेको दल रास्वपाले नैतिकताका आधारमा पद त्यागको अपेक्षा विभिन्न च्यानलबाट पटक पटक व्यक्त गरिसकेको छ ।