इजरायलले ट्रम्प सरकारको जासुसी गरिरहेको दाबी, के भन्छ इजरायल ?

काठमाडौं– अमेरिका र इजरायलबीच इरानलाई लिएर मतभेद बढ्दै गएको छ । यसैबीच अमेरिकी रक्षा मन्त्रालय (पेन्टागन) भित्र इजरायलले अमेरिकी अधिकारी र ट्रम्प सरकारको आन्तरिक जानकारी जुटाउन जासुसी गरिरहेको आरोप लागेको छ ।

एनबीसी न्युज रिपोर्टअनुसार दुई वर्तमान र एक पूर्व अमेरिकी अधिकारीले पेन्टागनको डिफेन्स इन्टेलिजेन्स एजेन्सी (डीआईए) ले भर्खरै इजरायलसँग जोडिएको काउन्टर–इन्टेलिजेन्स खतराको स्तर बढाएर गम्भीर बनाएको बताएका छन् । यसलाई एजेन्सीको सबैभन्दा गम्भीर अलर्ट मानिन्छ ।

अमेरिका र इजरायल जस्ता अत्यन्त निकट सहयोगीहरूबीच यस्तो हुनु निकै असामान्य मानिन्छ । यद्यपि इजरायलले यी आरोपहरूलाई पूर्ण रूपमा अस्वीकार गरेको छ । इजरायली दूतावासले आफूले अमेरिकी अधिकारीहरूको जासुसी नगर्ने र आफ्ना गुप्तचर एजेन्सीहरूले सहयोगी नभई शत्रुहरूमाथि निगरानी राख्ने बताएको छ ।

फोन र कम्प्युटर प्रयोग गर्दैनन् अधिकारीहरू

काउन्टर–इन्टेलिजेन्स खतराको स्तर बढाउँदा सबैभन्दा बढी असर ती अमेरिकी अधिकारीहरूलाई पर्न सक्छ जो इजरायलको यात्रा गर्छन् वा इजरायली अधिकारीहरूसँग प्रत्यक्ष सम्पर्कमा रहन्छन् । यद्यपि अमेरिका र इजरायलबीच गुप्तचर जानकारी आदानप्रदान गर्ने कार्य भने जारी रहनेछ ।

एक अमेरिकी अधिकारीले एनबीसीलाई बताएअनुसार अमेरिकाले आफ्ना वरिष्ठ अधिकारीहरूको इजरायल भ्रमणका क्रममा पहिलेदेखि नै विशेष सावधानी अपनाउँदै आएको छ । इजरायलमा रहेका अमेरिकी अधिकारीहरू आफ्नो फोन र ल्यापटप प्रयोग गर्दैनन् । उनीहरू बर्नर फोन अर्थात् प्रयोग गरेर फालिने फोन र विशेष कम्प्युटरको प्रयोग गर्छन् ।

Image Source: © https://mulpatra.com

धेरै पटक उनीहरू होटलका कोठा वा निगरानीको खतरा हुन सक्ने ठाउँहरूमा संवेदनशील विषयहरूमा छलफल गर्नेबारे पनि सचेत रहन्छन् । यसको कारण इजरायली गुप्तचर एजेन्सीहरूलाई जानकारी जुटाउने मामिलामा निकै आक्रामक मानिन्छ ।

यद्यपि अधिकारीहरूले खतराको स्तर अचानक बढाउनुपर्ने कुनै एउटा ठूलो घटना भने भएको थिएन । बरु, धेरै घटनाहरू र मूल्याङ्कनका आधारमा यो निर्णय लिइएको हो ।

अमेरिकी सुरक्षा एजेन्सीहरूले पहिले पनि कैयौँ पटक इजरायलको जासुसी गतिविधिलाई लिएर अलर्टको स्तर बढाइसकेका छन् र दुवैबीच ठूला विवादहरू भएका छन् ।

यो विवाद इरानलाई लिएर ट्रम्प र इजरायली प्रधानमन्त्री बेन्जामिन नेतन्याहुबीच मतभेद बढ्दै गएको अवस्थामा यो विवाद आएको हो । अप्रिलमा भएको युद्धविरामपछि ट्रम्प इरानसँग एउटा ठूलो सम्झौताको प्रयासमा छन्, जबकि नेतन्याहु इरानले कुनै पनि सम्झौताको पालना नगर्ने दाबी गर्नै आक्रमणलाई निरन्तरता दिइरहेका छन् ।

यसैबीच लेबनानमा हिजबुल्लाहविरुद्धको सैन्य अभियानलाई लिएर पनि अमेरिका र इजरायलबीच मतभेदका खबरहरू बाहिर आएका छन् । रिपोर्टहरूका अनुसार हालै ट्रम्प र नेतन्याहुबीच फोनमा चर्को भनाभन पनि भएको थियो ।

पछि ट्रम्पले इजरायली प्रधानमन्त्रीलाई अपशब्द भनेको स्वीकार गरेका थिए । यसले दुई नेताहरूबीच पश्चिम एसियाको रणनीतिको विषयमा गम्भीर मतभेद रहेको अड्कलबाजीलाई थप बल दिएको छ ।

अमेरिकी राष्ट्रपति ट्रम्पले ३ जुनमा न्युयोर्क पोस्टको एक पडकास्टमा आफूले नेतन्याहुलाई अपशब्द भनेको खुलासा गरेका थिए ।