३७ अन्तर्राष्ट्रिय खेल खेलेका फ्रान्स र स्पेन महाभिडन्तमा कसले मार्ला बाजी, विगतमा के छ ?

काठमाडौं । फिफा विश्वकप २०२६ को पहिलो सेमिफाइनलमा दुई युरोपेली फुटबल महाशक्ति फ्रान्स र स्पेन आमनेसामने हुँदैछन्। डलासमा हुने यो खेललाई विश्व फुटबलकै सबैभन्दा ठूलो र रोमाञ्चक भिडन्तमध्ये एकका रूपमा हेरिएको छ। एकातिर लगातार तेस्रो विश्वकप फाइनल पुग्ने इतिहास रच्ने लक्ष्यसहित फ्रान्स मैदानमा उत्रँदैछ भने अर्कोतर्फ सन् २०१० पछि फेरि विश्वकपको उपाधि जित्ने अभियानमा रहेको स्पेन छ। दुवै टोली उत्कृष्ट लयमा रहेकाले यो खेलको विजेताबारे अनुमान गर्न कठिन भएको विश्लेषकहरूको भनाइ छ।

फ्रान्सले समूह चरणमा सेनेगल, इराक र नर्वेलाई पराजित गर्दै नकआउट चरणमा प्रवेश गरेको थियो। त्यसपछि स्विडेन, पाराग्वे र मोरक्कोलाई हराउँदै टोली अन्तिम चारमा पुगेको हो। स्पेनले पनि समूह चरणपछि अस्ट्रिया, पोर्चुगल र बेल्जियमलाई पराजित गर्दै सेमिफाइनल यात्रा तय गरेको छ। दुवै टोलीले प्रतियोगिताभर प्रभावशाली प्रदर्शन गरेकाले यस खेललाई ुड्रिम सेमिफाइनलु को संज्ञा दिइएको छ।

दुई टोलीबीचको विगतको इतिहास पनि निकै रोचक छ। हालसम्म फ्रान्स र स्पेनबीच ३७ अन्तर्राष्ट्रिय खेल भएका छन्। तीमध्ये फ्रान्सले १७ खेल जितेको छ भने स्पेनले पनि १७ खेल आफ्नो पक्षमा पारेको छ। बाँकी तीन खेल बराबरीमा टुंगिएका छन्। समग्र नतिजा बराबरी भए पनि पछिल्ला दुई ठूला प्रतिस्पर्धामा भने स्पेन हाबी देखिएको छ। युरो २०२४ को सेमिफाइनलमा स्पेनले फ्रान्सलाई २–१ ले हराएको थियो भने यूईएफए नेसन्स लिग २०२५ मा ५–४ को रोमाञ्चक जित निकालेको थियो। त्यसैले मनोवैज्ञानिक रूपमा स्पेन केही बलियो अवस्थामा रहेको विश्लेषण गरिएको छ।

विश्वकपमा भने इतिहास फ्रान्सको पक्षमा छ। यी दुई टोली विश्वकपमा अहिलेसम्म एकपटक मात्रै भिडेका छन्। सन् २००६ को विश्वकपको राउण्ड अफ १६ मा स्पेनले सुरुआती अग्रता लिए पनि फ्रान्क रिबेरी, प्याट्रिक भिएरा र जिनेदिन जिदानको उत्कृष्ट प्रदर्शनमा फ्रान्सले ३–१ को जित निकाल्दै स्पेनलाई प्रतियोगिताबाट बाहिरिएको थियो।

यसपटक फ्रान्सको सबैभन्दा ठूलो आशा कप्तान किलियन एम्बाप्पेमाथि छ। २७ वर्षीय एम्बाप्पे यस विश्वकपमा आठ गोलसहित उत्कृष्ट लयमा छन्। २०१८ मा फ्रान्सलाई विश्वकप जिताएका एम्बाप्पेले २०२२ मा गोल्डेन बुट जितेका थिए भने अहिले लगातार तेस्रो विश्वकप फाइनलमा टोलीलाई पुर्‍याउने लक्ष्य बोकेर मैदानमा उत्रनेछन्। एम्बाप्पेसँगै उस्मान डेम्बेले, माइकल ओलिसे, ब्राडली बार्कोला र डेजिरे डुए फ्रान्सको आक्रमणलाई थप धारिलो बनाइरहेका छन्।

स्पेनको सबैभन्दा ठूलो हतियार भने १८ वर्षीय युवा स्टार लामिन यामाल हुन्। करिब १.८० मिटर अग्ला यामालको तौल करिब ७२ किलोग्राम छ। उनले पछिल्ला दुई खेलमा फ्रान्सविरुद्ध तीन गोल गरिसकेका छन्। युरो २०२४ को सेमिफाइनलमा उनले निर्णायक भूमिका खेलेका थिए भने नेसन्स लिगमा पनि फ्रान्सलाई ठूलो चुनौती दिएका थिए। यामालसँगै रोड्री, पेड्री, दानी ओल्मो, निको विलियम्स, मिकेल ओयार्जाबाल, पाउ कुबार्सी र गोलरक्षक उनाइ सिमोन स्पेनका प्रमुख खेलाडीका रूपमा रहेका छन्।

Image Source: © https://mulpatra.com

खेल शैलीको हिसाबले हेर्दा फ्रान्सको सबैभन्दा ठूलो बल तीव्र काउन्टर अट्याक, एम्बाप्पेको असाधारण गति, डेम्बेलेको प्रेसिङ र नकआउट चरणको अनुभव हो। लगातार दुई विश्वकप फाइनल खेलेको टोली भएकाले दबाबका खेल खेल्ने अनुभव पनि फ्रान्ससँग पर्याप्त छ। उता स्पेन बल नियन्त्रण, उत्कृष्ट मिडफिल्ड, संगठित रक्षा र उच्च प्रेसिङका कारण बलियो देखिएको छ। लामिन यामालको व्यक्तिगत प्रतिभाले स्पेनलाई कुनै पनि क्षण खेल बदल्ने क्षमता दिएको छ। प्रतियोगिताभर स्पेनले एक गोल मात्र बेहोरेको छ भने फ्रान्सले नकआउट चरणमा कुनै गोल खाएको छैन।

विश्वकप इतिहासमा फ्रान्स दुईपटक (१९९८ र २०१८) च्याम्पियन बनिसकेको टोली हो। यसपटक जित निकाल्न सके लगातार तेस्रो विश्वकप फाइनल खेल्ने दुर्लभ कीर्तिमान बनाउने अवसर फ्रान्ससँग हुनेछ। स्पेन भने २०१० को विश्वविजेता हो र १६ वर्षपछि पुनः फाइनल पुग्ने लक्ष्यमा छ।

अन्तर्राष्ट्रिय सञ्चारमाध्यम र फुटबल विश्लेषकहरूले पनि यो खेललाई विश्वकपकै सबैभन्दा सन्तुलित सेमिफाइनलका रूपमा व्याख्या गरेका छन्। उनीहरूका अनुसार फ्रान्सको विस्फोटक आक्रमण र स्पेनको बल नियन्त्रणबीचको प्रतिस्पर्धा नै खेलको निर्णायक पक्ष बन्न सक्छ। अधिकांश विश्लेषकले फ्रान्सलाई हल्का दाबेदार माने पनि स्पेनले पछिल्ला दुई प्रतिस्पर्धात्मक भेटमा फ्रान्सलाई हराइसकेकाले खेल कुनै पनि दिशामा जान सक्ने बताएका छन्।

समग्रमा हेर्दा फ्रान्ससँग एम्बाप्पेको नेतृत्व, गहिरो बेन्च र ठूलो विश्वकप अनुभव छ भने स्पेनसँग लामिन यामालको उत्कृष्ट लय, बल नियन्त्रण गर्ने शैली र फ्रान्सविरुद्धको पछिल्लो सफल इतिहास छ। त्यसैले डलासमा हुने यो सेमिफाइनल केवल दुई टोलीबीचको प्रतिस्पर्धा मात्र नभई आधुनिक विश्व फुटबलका दुई फरक दर्शन—गति र आक्रमण विरुद्ध बल नियन्त्रण र प्राविधिक उत्कृष्टता—बीचको निर्णायक परीक्षा पनि हुनेछ। –एजेन्सीको सहयोगमा