युवराजको नयाँ गीत ‘म त जिउँदै मरेकी छु’ को म्युजिक भिडियो छिट्टै बजारमा

काठमाडौं– लामो समयदेखि सामाजिक सञ्जालमा चर्चित युवराज सफल अब नयाँ परिचयका साथ नेपाली सांगीतिक क्षेत्रमा आउँदै छन् । “म त जिउँदै मरेकी छु“ नामक वियोगान्त गीतको म्युजिक भिडियो केही दिनभित्रै सार्वजनिक हुने तयारीमा रहेको छ ।

यस गीतमा मोडल एवम् नायिका नम्रता सापकोटा, अनुप जङ्ग थापा, सजिना लामिछाने, र स्वयं युवराज सफलले अभिनय गरेका छन्। गीतको स्वर निरा रानाभाटले दिएकी छन् भने संगीत कृष्ण भारद्वाजको छ। शब्द रचना सफल स्वयंले गरेका छन् ।

गीतको म्युजिक भिडियोको निर्देशन राहुल बराइलीले गरेका हुन् । वियोगान्त कथालाई मुख्य विषयवस्तु बनाएर तयार पारिएको यो गीतले युवराज सफललाई कवि मात्र होइन, अब एक गीतकारको रुपमा पनि चिनाउने देखिन्छ ।

युवराज सफलको करिब डेढ दशकअघि “देशलाई सलाम“ नामक कविता सङ्ग्रह प्रकाशित भएको थियो । अहिले उनको यो गीत नेपाली संगीतप्रेमीहरूमाझ भावनात्मक रूपमा गहिरो छाप छोड्ने अपेक्षा गरिएको छ ।

युवराज सफलले ललितपुर पोस्टलाई दिएको जानकारीअनुसार यो गीत र म्युजिक भिडियोले सामाजिक सञ्जालमा चर्चा पाउन मात्र होइन, नेपाली सांगीतिक क्षेत्रमै छुट्टै पहिचान बनाउन सफल हुने विश्वास छ ।